هي: (هلعة) أرجوك يا دكتور.. أنا ماليش أمل غيرك.. انقذني يا دكتور.
أنا: (محاولا طمأنتها) طيب اهدي يا ستي.. خلي أملك في ربنا.. واللي في ايدي ها أعمله.
هي: إنت الأمل الوحيد يا دكتور.. وأنا متأكدة انك مش ها تخذلني.
أنا: (بهدوء) خلينا نشوف انتي عاوزة إيه وأنا أقدر أعمله ولا لأ.
هي: خطوبتي بعد اسبوعين يا دكتور.. وأنا لازم أخس بسرعة.
أنا: (مندهشا) تخسي بسرعة في اسبوعين؟ طب ازاي؟
هي: أنا اللي ها أقولك برضه ازاي يا دكتور؟ أمال انت دكتور ليه؟
أنا: مش معنى إني دكتور إني أكون ساحر أقول للشيء كن فيكون. خلينا الأول نشوف انتي لازم تنزلي كام كيلو.
بعد قياس الطول والوزن..
أنا: دلوقتي مطلوب انك تخفضي وزنك 40 كيلو جرام.
هي: ممكن أنزلهم في اسبوعين يا دكتور؟
أنا: انتي وزنك زايد من امتى؟
هي: يوووووه.. من وأنا صغيرة خالص.. أنا أول ما انتبهت على نفسي وأنا كلبوظة.
أنا: يعني بقالك بتاع حاجة وعشرين سنة وزنك زائد؟
هي: (بحسرة) آه.
أنا: بصراحة مش ممكن خفض الوزن الزايد في اسبوعين.
هي: الله!! أمال أنا جاية لك ليه؟
أنا: يعني وزن زائد في حاجة وعشرين سنة ينزل في اسبوعين؟
هي: ليه لآ؟ أنا سمعت عن واحدة جارة واحدة صاحبة مامة ابن خالي اسماعيل إن وزنها نزل 30 كيلو في اسبوع واحد.
أنا: يا ستي دا مستحيل طبيا. إنتي شفتيها بنفسك؟
هي: لآ أنا سمعت.
أنا: فيه مبالغة شديدة في الموضوع دا. ممكن نساعدك على خفض وزنك 6-10 كيلوجرامات شهريا.
هي: (بيأس) بس؟
أنا: على شرط تلتزمي بالنظام الغذائي اللي ها اديهولك.
هي: وكمان نظام غذائي؟
أنا: الله.. هو انتي فاكرة اني ها اخسسك ازاي؟
هي: موافقة بس على شرط..
أنا: إيه الشرط دا؟
هي: انك ما تمنعنيش من الحلويات.. أنا بأعشق الحلويات!!
أنا: يبقى مش ها نتفق..
هي: ليه؟
أنا: لأن أول شرط لخفض وزنك هو الابتعاد عن السكريات والحلويات والتقليل من النشويات والدهون.
هي: كمان؟
أنا: مفيش طريقة غير دي. وبعدين انتي لازم تستني لحد اسبوعين قبل خطوبتك علشان تقرري تنزلي وزنك؟
هي: أنا كنت فاكرة ان اسبوعين فترة كافية جدا.
أنا: فترة كافية؟ مين اللي قاللك كده؟
هي:واحدة جارة واحدة صاحبة مامة ابن خالي اسماعيل.. و..