الأرشيف

أسئلة حول برنامج 7*7 – شيماء من أسيوط

الأستشارات  :  الأربعاء 22 يونيو 2011

(ننشر هذه الرسالة لأهمية أسئلتها ولكي تعم الفائدة. د. عماد)

أنا أتابع معكم في برنامج 7*7 من خلال العيادة الالكترونية كما تعرف. نفسى أكتب لحضرتك من كذا يوم بس للأسف عندى ضغط شغل رهيب الأيام دى عموماً ان شاء الله ربنا يكرمنى و ما حدش ييجى لحد ما اخلص كتابة علشان أفكارى ما تضيعش. زى ما قلت لحضرتك قبل كدة عندى شوية تفاصيل حابة أسال عنها بس كنت مؤجلاهم  للأسبوع الأخير بس تعليق حضرتك بخصوص الرجيم و انه هرمونى مش سعرات خلانى حابة أسألهم دلوقتى و الأسئلة فى نقاط محددة علشان ما أنساش حاجة ان شاء الله كالتالى :

1- ما معنى نظام هرمونى؟ و ما الهدف منه و تأثيره على المدى الطويل بعد ايقاف الرجيم؟ ( هل تأثيره ممتد أم خلال فترة الرجيم فقط، بمعنى آخر بعد انتهاء الرجيم اذا أكلت حاجة من الممنوعات بتاعتنا مع مراعاة الكميات و السعرات الدنيا هتمشى بخير و أفضل زى ما انا على نفس الوزن، و لا هيكون فى نتايج عكسية) ؟ 
2- ما تأثير تناول بعض الأصناف الممنوعة خلال هذا النظام ؟ ( أول أسبوع لما لخبطت فيه حضرتك قلت باللفظ كدة هرموناتى هتتلخبط وبصراحة ساعتها ما فهمتش الجملة و قلت فى بالى هرمونات ايه و ايه علاقة الهرمونات بالرجيم بس سكت و قلت فى بالى ما علينا و خلينى التزم و نشوف النتيجة ( بس ده بدون فهم ) و حضرتك سيد العارفين الحفظ ما بينفعش علشان كدة من فضلك عايزة أفهم ( مش تدخل فى شغلك لا سمح الله ) بس بصراحة لما أعمل الحاجة و انا فاهمة ليه ده أحسن لى علشان هلتزم بيها أكتر.
3- على حسب فكرتى المبدئية من جملة حضرتك اللى تحت أفهم انه لا  يمكن توقيف النظام لمدة أسبوع و نرجع نبدأ من نفس النقطة، و لا ممكن ؟
( سبب السؤال ده حضرتك عارف انا حاليا فى الأسبوع السادس اللى هينتهى الأحد الجاى و المفروض أبدأ السابع يوم الاتنين المشكلة بقى انى يوم الثلاثاء ان شاء الله مسافرة الغردقة و هقعد فى قرية سياحية و اقامتى شاملة كل حاجة  و معايا العيلة و الأصحاب يعنى بصراحة أكيد هيكون فيه حاجة كدة أو كدة آه أنا هبقى واخدة بالى من الكمية و أحاول أوازن اللى هاكله على مدار اليوم بس ممكن قوى ووارد جدا يكون فى حاجات مختلفة عن نظامنا ايه العمل بقى).
4- لو اجابة السؤال اللى فوق انه مش ممكن اعمل ده هل هينفع ساعتها بعد ما ارجع ابدأ الرجيم من الأول تانى علشان نكمل بسلام و لا لأ؟
5- بوجه عام هل يمكن لى اعادة الرجيم من الأول تانى فى أى وقت و هل ده هيكون مفيد و له مردود ايجابى أم لا ؟
6- بالنسبة للسكر بقى هل المفروض بعد انتهاء النظام بتاعنا برده استمر على السكر الصناعى و لحد امتى و بعدين ده ما لوش أضرار جانبية على المدى الطويل ربنا يحفظنا ؟
7- فى النهاية و بعد الوصول لوزن مناسب ان شاء الله بفكر فعلاً فى عمليات اصلاح القوام (تحديداً شفط الدهون بالليزر ) طبعاً ده فى حالة ان تكلفتها معقولة و اقدر اتحملها فما رأى حضرتك فى الموضوع ده لأن طبعاً أنا عندى مخاوف و لو شايف انه ما فيهوش مشكلة و آمن هل تنصحنى بطبيب أو مركز معين ؟
أخيراً أنا عارفة انى طولت على حضرتك و ان التفاصيل داخل أسئلتى كتيرة و الإجابة عليها محتاجة وقت بس سامحنى علشان بصراحة كل اللى سألته لحضرتك ده مهم جدا بالنسبة لى أفهمه علشان اقدر امشى مظبوط خصوصاً و انى فعلا المرة دى مقررة ان الرجيم مش مجرد مرحلة زمنية و تعدى و نرجع تانى بعد كدة لأ أنا فعلا عايزة اوصل لحاجة تستمر معايا عمرى الباقى ان شاء الله ( يا رب ).
مرة أخرى سامحنى عالاطالة و الاسهاب فى التفاصيل .

__________________________________________________________________

1. معنى نظام هرموني: ان هورموناتك ترجع تتظبط وتصبح على مستويات صحية كما أرادها الله أن تكون، بعدما اربكها تناولك للسكريات والحلويات والنشويات. ولا يوجد في عرفنا حاجة اسمها ايقاف الريجيم، لكن يجب الاستمرار في تبني السلوك الغذائي الجديد الذي تعلمه من خلال نظامنا الغذائي 7*7 وأي انحراف عن هذا السلوك الغذائي الصحي السليم سيعود بك للمربع رقم واحد.. يعني للسمنة مرة أخرى.. الممنوعات في نظامنا تظل ممنوعات للأبد. مرة أخرى الحكاية مش سعرات.. يعني ينفع الواحد ياخد سم ويحسب سعراته؟ هكذا الحال بالنسبة للسكر العادي الأبيض، فهو سم ولم يخلقه الله لاجسامنا.. لكننا صنعناه في مصنع الحوامدية للسكر.

2. تناول الاصناف الممنوعة مثل وضع الماء في تانك البنزين في السيارة.. سوف يعطل كل شيء.

3. ايقاف النظام لمدة اسبوع معناه بداية 7*7 من أول نقطة.. وتكرار الايقاف واللخبطة والاعادة معناه مقاومة الجسم للنزول فيما بعد. تمتعي بكل مخلوقات الله في الطعام وأنت في الغردقة بما يتفق وما تعلمتيه من 7*7، وتذكري مجهودك في الاسابيع السابقة ولا تضيعيه ولا تضعي نفسك في مقارنة مع من لا يتبع نظام غذائي محدد لخفض الوزن.

4. انت حرة في كل اختياراتك.. لكن الرشاقة جوهرة ثمينة يجب دفع ثمنها حتى ولو كان بعض الحرمان، فلا ينفع أن تأكلي بلح الشام وعنب اليمن في نفس الوقت.

5. اذا نجحت في اتمام نظام 7*7 دون أخطاء يمكنك الاستفادة من كل الافكار التي جاءت به حتى لو قررت اعادته كله.

6. السكر بالنسبة لك من الممنوعات للأبد، ويمكنك الاستمرار على السكر الصناعي الذي يتمتع بعدم وجود أي أضرار له على المدى الطويل ولا تصدقي كل ما يقال من أكاذيب عن ذلك.

7. لا يوجد شفط دهون بالليزر، ولكن توجد جراحة لشفط الدهون، وهذه لا أنصحك بها.

أجبت على كل تساؤلاتك بكل صراحة.. والصراحة تؤلم أحيانا.. مع كل أمنياتي لك بالصحة والسعادة.