الأرشيف

يوميات طبيب تخسيس – تثبيت الوزن (6)

يوميات طبيب تخسيس  :  الإثنين 9 نوفمبر 2009

هي: يا دكتور.. أنا بأه عاوزاك تثبت وزني.

أنا: يعني ايه؟

هي: يعني تعمل لي تثبيت علشان ما اتخنش تاني.

أنا: التثبيت معناه إن اللي اتعلمتيه معايا طول فترة خفض الوزن تطبقيه في المستقبل.

هي: بس أنا سمعت ان فيه دكاترة بيثبتوا الوزن بالابر الصينية.

أنا: (مندهشا) ازاي يعني؟

هي: بيحطوا ابرة في صباع الرجل الكبير.. وبعدها يقولوا للمتابع روح بأه كل اللي نفسك فيه ومش ها تتخن تاني أبدا.

أنا: وانتي بأه مصدقة الكلام دا؟

هي: آه.. طبعا.. مش اللي بيقولوا الكلام دا دكاترة؟

أنا: انتي مش بتسمعي برضه اشاعة ان اللي بيترك العلاج الابر الصينية بيتخن أكتر من الأول؟

هي: آه باسمع.. وحتى كمان فيه واحدة صاحبتي حطت ابرة التثبيت بس بعدها تخنت أكثر من الأول..

أنا: أهي ابرة التثبيت دي هي السبب في رجوع الوزن الزائد مرة تانية.

هي: ازاي؟

أنا: أقولك ازاي.. بعد الواحدة ما تتعلم ازاي تاكل صح وتشرب صح.. مفروض بقى تطبق اللي اتعلمته في مستقبل أيامها.. لكن اللي بيحصل ان بعض الدكاترة للأسف اللي مش دارسين علم الوخز بالابر دراسة حقيقية وعميقة بيقدروا يحصلوا على بعض النتائج في خفض الوزن من خلال وضع الابر في الاذن.. ودا بيعرفوه بسطحية من مراقبة موضع الابر في أذان بعض المتابعين عند دكاترة آخرين.. وبيطبقوه على مرضاهم.. وبالفعل بيجيبوا نتيجة وقتية.. لكنهم الظاهر بيكونوا متأثرين باللي بيطلعوا العفاريت من صباع الرجل الكبير.. بيوهموا المرضى ان ابرة في صباع الرجل بتثبت الوزن.. وللأسف بيدوهم نصيحة خاطئة جدا انهم ممكن يرجعوا ياكلوا اللي نفسهم فيه وما يتخنوش..

هي: وبعدين؟

أنا: وبعدين تحصل المصيبة.. ترجع الواحدة من دول لوزنها الأصلي الزائد ويمكن أكثر كمان.

هي: يعني الزيادة مش علشان سابت الابر الصينية؟

أنا: لأ.. الزيادة سببها الانفتاح على الأكل تحت وهم ان ابرة صباع الرجل الكبير بتحمي من زيادة الوزن.

هي: (حزينة) يا خسارة.. يعني مفيش تثبيت؟

أنا: لأ فيه تثبيت طبعا.. التثبيت الحقيقي هو في اتباع السلوكيات الغذائية والحركية الصحيحة اللي اتعلمتيها معانا طول فترة الريجيم.. يعني بالعربي تبني هذه السلوكيات الصحيحة للأبد.. مفهوم؟

هي: (باستسلام) مفهوم يا دكتور..